السلام عليكم ورحمه الله وبركاته
اعزائى اعضاء المنتدى الكرام:
تحيه طيبه وبعد
انا ولاكون معكم صريح حديث العهد بالنت فأنا بقالى من 3 الى 4 سنين على الشبكه العنكبوتيه
لكنى بالنسبه للمنتديات حديث العهد فعلا فأنا بقالى حوالى الشهرين فقط
ومن خلال دورتى على المنتديات بمختلف انواعها وميولها لاحظت شىء غريب بالنسبه لى الا وهو قسم المدونات او المذكرات او اى كان اسمه
فلاحظت ان اغلب الاعضاء يكتبون اشياء فى غايه من الاهميه وهى حياتهم الشخصيه اللى هى المفروض توب سكريت
ولاحظت ايضا ان اغلب المشتركين فى هذه المدونات هم النساء
وقرأت اشياء يشيب لها الشعر من اسرار وحكايات من الف ليله وليله
فواحده متعاركه مع جوزها والتانيه بتقول على زوجها كلام جارح
واللى داخله اصلا النت بدون علم اهلها والخ الخ الخ
ولاحظت ايضا ان من يقرأ اغلب المدونات هم الرجاله
طيب نمسك الموضوع واحده واحده بالبلدى كده
منين الواحده بتشتكى من العضو الفلانى وهى اصلا فاضحه نفسها بنفسها
ولا منين واحده تانيه بتسأل نفسها هو فلان عرف الحاجات دى ازاى عنى
ياختى كميله
وبشوف ايضا ان النساء بتشتكى من الرجاله اللى بيخشوا يغلسوا عليهم
وبيسموهم ذئاب النت
اله طيب انتى عايزه ايه يعنى من الراجل اللى داخل النت يصطاد حاجات من دى
هو الاول يخش المدونه بتاعت الفريسه بتاعته ىيحفظها عن ظهر قلب
وبعد كده يبتدى يخطط واحده واحده لغايه ما يعرف يدخلها منين بالظبط
صح ولا لاء
ويا سلام بقى لو هى كاتبا انها محرومه من الكلام الحلو يا سيدى عليكى
انتى وعقتى ولا الهوا رماكى
وبعد كده نسمع بقه فضايح وخدوا عندكم
الواحده من دول تقلب الوش على فلان واسمع بقى احلى كلام بيتقال
ولما نقولها انتى ليه عماتى كده تقول اصله ضحك عليا
او عشمنى بالجواز
ويا سلام بقى لو هو اللى سابها علشان مثلا عضوه جديده اسمعوا بقى
الشردحه اللى على حق
المقصود يا جماعه من الرغى بتاعى الكتير ده انى اقولكم خلوا بالكم الغلط
بييجى مننا احنا الاول والتانيين هما اللى بيتصرفوا معانا على حسب غلطنا
يا اختى فى الاسلام فى اى مكان صونى نفسك لا تبوحى بأسرارك لحد غريب
احنا مش شايفين بعض والكتابه لا تعبر بشكل مباشر عن حقيقه الشخص
اللى امامك على الكيبورد
كل واحد فينا بيحلى نفسه
ياما سمعنا ان رجاله اشتركت بأسامى حريم فى المنتديات النسائيه
واللى احلى من كده انه بيتكلم معاهم كأنه واخد ابنه على حجره بيرضعه
يا جماعه الخير ارجوكم خلوا بالكم من كتابتكم فى المدونات اقصروا الشر
طبعا انا عارف ان فى اعضاء حايقولولى ايه يا عم بلاش نفضفض عن نفسنا
شويه ما تكبرهاش كده وخليها على الله
ماشى يا عم حانخليها على الله بس الله مقلش كده
المهم يا جماعه انا عايز اعرف رأيكم بصراحه فى حكايه المدونات او المذكرات اللى موجوده فى اغلب المنتديات
وايه رأيكم فى كلامى معاه ولا ضده ؟؟
واخيرا هل كان لكم تجربه مباشره مع هذه المدونات؟؟؟؟؟؟؟؟؟
ارجوا ان لا اكون طولت عليكم وفى انتظار تفاعلكم
ملحوظه :
اقسم بالله العظيم انا كلامى مفهوش مساس بأى شخص بعينه انا كلامى عامى
والله على ما اقول شهيد
والسلام عليكم ورحمه الله وبركاته